BUTUAN CITY- Nakapagawas na og kinatibuk-ang P60 milyon nga cash assistance ang Unified Package for Livelihoods, Industry, Food, and Transport o UPLIFT program ngadto sa mga kwalipikadong benepisyaryo sa Agusan del Sur.
Sukad Agosto 14, mikabat na sa 30,417 sa 42,505 nga natalang benepisyaryo ang nakadawat na sa P2,000 nga ayuda, kansa bugti sa 71.56 porsyentong payout rate, samtang nakakompleto na usab sa payout activities ang tanang 13 ka lungsod ug usa ka component city sa probinsya. Ang mga benepisyaryo giila base sa Community-Based Monitoring System o CBMS sa Philippine Statistics Authority, diin gitino ang mga kabus ug near-poor nga panimalay nga nanginahanglan og tabang.
Ang kwalipikadong panimalay makadawat sa ayuda matag bulan gikan Hulyo hangtod Disyembre 2026, samtang ang mga miyembro sa 4Ps makadawat niini isip one-time assistance. Sumala ni Social Welfare Officer II Cristian Silverio, gipahapsay ang proseso sa payout ug gipahigayon ang validation sa identidad ug mga dokumento aron masiguro nga ang hustong benepisyaryo lamang ang makadawat sa ayuda.
Ang unang payout gihimo onsite, samtang ang sunod nga mga pagpagawas sa cash assistance hangtod sa kataposan sa 2026 ipatuman pinaagi sa money transfer. Sa Prosperidad, 1,181 ka benepisyaryo ang gitawag alang sa payout niadtong Agosto 13, samtang kapin 2,500 usab sa San Francisco ang nakadawat niadtong Agosto 14.
