BUTUAN CITY- Nakadawat gihapon og sweldo sulod sa daghang katuigan bisan dugay nang wala motunga sa trabaho ang usa ka engineer sa Cádiz, Spain, nga nailang si Joaquin Garcia, kinsa nakadawat og tinuig nga sweldo nga mokabat sa 37,000 euros o kapin P2.2 milyon.
Nadiskubrehan ang iyang dugay nga pagkawala dihang giplanong hatagan siya og service award tungod sa 20 ka tuig nga serbisyo, apan wala kini mahagilap sa mga opisyal, sa pag-usisa, nasuta nga labing menos unom ka tuig na kining wala nagreport sa opisina, samtang adunay mga report nga mahimong mokabat og 14 ka tuig ang iyang pagkawala.
Sa iyang depensa, sigon ni Garcia nga nagtrabaho kini apan dili regular ang iyang oras ug giangkon nga nakaagi siya og problema sa workplace ug bullying.
Samtang adunay kalibog tali sa municipal water company ug city council bahin sa responsable sa iyang pagdumala, sa ulahi gikasuhan siya ug gipamulta og 27,000 euros o kapin P1.6 milyon tungod sa dugay niyang pagkawala samtang padayon nga nakadawat og sweldo, nga nahimong pahimangno sa importansya sa accountability sa empleyado ug hustong pagmonitor sa management sa attendance ug trabaho sa mga kawani.
