BUTUAN CITY – Napugngan sa National Bureau of Investigation (NBI) ang giplanong pagpamusil sa usa ka eskwelahan sa Batac City, Ilocos Norte nga gilambigitan sa tulo ka 16-anyos nga estudyante, human makadawat og impormasyon gikan sa Federal Bureau of Investigation (FBI) sa Estados Unidos.
Sumala sa NBI Director Melvin Matibag, nadiskobrehan sa FBI ang maong plano pinaagi sa ilang nasubay nga panaghisgot sa Instagram, diin gihisgotan sa mga menor de edad ang paghimo og pagpamusil nga susama sa Columbine High School massacre sa Colorado niadtong 1999.
Dugang ni Matibag, mi-angkon ang usa sa mga menor de edad nga nagplano silang mamusil sa mga estudyante sugod Disyembre 16, o sa pagsugod sa Simbang Gabi tungod matud pa sa pagpangdaog-daog o bullying nga nasinati sa usa kanila sukad pa sa Grade 7.
Kapin sa lima ka posibleng target ang nailhan sa ilang online conversation, lakip ang mga gika-ingong nangdaog-daog sa usa sa mga suspek.
Nahisgotan usab sa ilang panaghisgot ang pagkuha og mga armas ug bala, posibleng daghang biktima ug ang plano nga maghikog human sa pag-atake.
Gi-isip sa FBI nga kritikal ug hapit nang mahitabo ang hulga, hinungdan nga gilusad sa NBI ang managlahing operasyon niadtong Domingo ug Lunes ug nadakpan ang tulo ka menor de edad.
Narekober usab ang usa ka armas nga gila-ingong gikuha sa usa kanila gikan sa iyang ginikanan pinaagi sa pagpasangil nga gamiton isip props sa school project.
Samtang, susihon pa sa NBI kung nakasabot ba ang mga menor de edad sa kabug-at ug posibleng sangpotanan sa ilang mga lihok ubos sa balaod sa juvenile justice. Ang Department of Social Welfare and Development (DSWD) naghatag na usab kanila og mental health interventions ug suporta.












