-- ADVERTISEMENT --

BUTUAN CITY – Gidayeg ni US President Donald Trump si Pangulong Ferdinand Marcos Jr. tungod sa malampusong pagpahigayon sa 49th ASEAN Summit sa Pilipinas.

Atol sa banquet dinner uban sa mga world leaders nga mitambong sa maong summit, personal nga gipadayag ni Trump ang iyang pagdayeg kang Marcos tungod sa malampusong pag-host sa maong internasyonal nga kalihokan.

Wala usab itago ni Trump ang iyang pagdayeg sa anak sa presidente nga si Ilocos Norte Representative Sandro Marcos, nga maoy misugat kaniya sa iyang pag-abot sa Villamor Airbase.

Sumala ni Trump, anaa na sa dugo sa pamilyang Marcos ang pagkamalampuson, ilabina kay personal usab niyang nailhan kaniadto ang amahan sa presidente nga si kanhi Pangulong Ferdinand Marcos Sr.

Gi-awhag usab ni Trump si Marcos nga ipahibalo kanila pinaagi kang US Secretary of State Marco Rubio kung aduna man siyay panginahanglan o hangyo.

-- ADVERTISEMENT --

Nagpasiaw pa ang US President nga iyang tangtangon sa puwesto si Rubio kung dili niini tagdon ang iyang hangyo.

Sa kabahinan ni Pangulong Marcos jr, gi-abi-abi niini ang bisitang si Trump pinaagi sa pagpamatuod nga ang presensiya ni Trump nagpasabot nga ang Estados Unidos ug ASEAN adunay importanteng papel sa paghulma sa kaugmaon sa rehiyon.

Gihisgotan usab niini ang ilang mga paningkamot sa pagpangita og bag-ong paagi aron mas mapalig-on ang pagtinabangay sa mga nasud.