BUTUAN CITY- Wala na nakitaan sa House prosecution panel nga magpresentar pa og dugang ebidensya kalabot sa alegasyon sa unexplained wealth batok kang Vice President Sara Duterte sa nagpadayong impeachment trial.
Sumala ni Atty. Benjamin “Jay” Tolosa Jr., legal spokesperson ug private prosecutor sa House prosecution panel, kombinsido ang ilang kampo nga igo na ang mga dokumento ug ebidensyang ilang gipresentar sa impeachment court aron pamatud-an ang giingong wala ma-deklarang bahandi ug mga kabtangan nga mokabat sa kapin P800 milyones, nga gilambigit sa Bise Presidente ug sa iyang bana nga si Atty. Manases “Mans” Carpio.
Sigon pa ni Tolosa, igo na ang ilang mga ebidensya sa wala pa nila pormal nga gitapos ang presentasyon sa kaso sa prosekusyon, busa anaa na karon sa kampo sa depensa ang higayon nga tubagon ug pamatud-an nga walay kamatuoran ang maong mga alegasyon.
Kahinumdumang nagsugod ang maong kantidad sa pagsusi ni prosecution witness ug forensic accounting expert Alexander Cabrera sa mga bank records, tax documents, corporate records ug Statements of Assets, Liabilities and Net Worth (SALN) sa mag-ti-ayong Duterte-Carpio gikan 2022 hangtud 2025.
Pormal na nga nahuman ang House prosecution panel human gipresentar ang ilang mga ebidensiya ug mga testigo. Lakip sa nag-unang gi-presentar sa prosekusyon ang matud pa wala gidiklarang mga bank account, transaksiyon ug uban pang pinansiyal nga interes sa Bise Presidente ug sa asawa niini.
Sa pikas bahin, gi-insistar usab ni House Deputy Speaker ug Iloilo Representative Janette Garin nga si Duterte mismo ang pinakamaayo nga makahatag og katin-awan sa mga alegasyon ug makapagpanghimakak sa mga alegasyon batok niini.
Sigon ni Garin, importante nga pahimuslan sa Bise Presidente ang higayong gihatag sa impeachment court aron personal nga tubagon ang mga isyung gibato batok niini. Dugang pa niini, nga kini usab matud pa ang pinakamaayo nga higayon ni Duterte aron limpyuhon ang pangalanan niini ug pamataud-an ang iyang kampo sa pag-atubang sa mga senator-judges.
Kahinumdumang sa unang simana sa presentasyon sa depensa, unom ka testigo ang ming-atubang sa impeachment court, samtang 18 sa unang 24 nga nakalistang testigo ang wala na mingdayon o dili na kinahanglang mo-atubang. Samtang sigon sa tigpamaba sa depensa nga si Atty. Michael Poa nga aduna pa silay 8 hangtud 10 ka testigong gilaomang upa-atubang adiser hingpit nga matapos ang ilang presentasyon sa ebidensya.
