BUTUAN CITY- Lauman nga magpadayon hangtod sa sunod semana ang pagkunhod sa presyo sa gasolina, diesel ug kerosene tungod sa padayon nga pag-ubos sa presyo sa lana sa world market, diin sumala sa Department of Energy kon DOE, posibleng mokunhod og P3.00 hangtod P4.00 kada litro ang gasolina, P4.00 hangtod P5.00 ang diesel, samtang P6.00 kada litro usab ang gilaom nga rollback sa kerosene base sa tulo ka adlaw nga trading sa Mean of Platts Singapore (MOPS).
Hinuon, medyo nakapugong sa mas dakong pag-ubos sa presyo ang gamayng pagsaka pag-usab sa presyo sa krudo tungod sa nagkataas nga tensiyon sa Strait of Hormuz, lakip na ang pagtaas sa bili sa dolyar batok sa piso, diin miabli sa P63.72 ang exchange rate niadtong Biyernes, Nobyembre 13, ug miduol sa P64 ang matag dolyar.
Sumala pa, nahitabo kini human sa dakong rollback sa presyo sa petrolyo niadtong miaging semana, diin gasolina ang nakasinati sa pinakadakong pagkunhod nga mikabat sa P16.80 kada litro, samtang pipila usab ka kompanya sa liquefied petroleum gas (LPG) ang nagpatuman og price rollback bisan wala pa moabot ang ilang gitakdang binulan nga adjustment, subay sa pag-ubos sa contract prices.
Samtang, gipasalig usab sa Bangko Sentral ng Pilipinas (BSP) niadtong Miyerkules, Nobyembre 11, ang padayon nga pagpanalipod sa purchasing power sa piso taliwala sa epekto sa presyo sa petrolyo sa inflation sa nasud, ug gitakdang ipahigayon sa sentral nga bangko ang kataposang monetary policy meeting alang sa tuig karong Disyembre 17.
