BUTUAN CITY – All set na ang Philippine Red Cross-Agusan del Norte/Butuan City chapter alang sa Dugong Bombo 2026: A Little Pain, A Life to Gain’ bloodletting activity ugmang adlawa Sabado nga himuon sa Event Center, 3rd Floor sa SM City ning siyudad sa Butuan.
Sa eksklusibong pakighinabi sa Bombo Radyo Butuan, gipadayag ni chapter administrator Alger Boter nga usa ka maayong inisyatiba ang tinuig nga gihimo sa Bombo Radyo Philippines ilabina nga nagkadaghan karon ang nanginahanglan og dugo tungod sa nagkataas nga demand ug nagkadaghang ospital ug healthcare facility dinhi sa Butuan City.
Aron mulampos sa pagdonar og dugo, gi-awhag sa opisyal ang tanang mulambigit sa sa biggest and bloodiest bloodletting activity ugmang adlawa nga andamon ang kaugalingon sa ingon himsog ug ha-um kini pag-abot sa venue.
Gipasabot ni Boter nga kinahanglang wala’y hilanat, wala gi-ubo o kaha gisip-on ang gustong mahimong blood donor tungod kay ang maong balatian, simtomas matud pa nga duna’y impeksyon sa lawas ang usa ka tawo.
Mas maayo usab nga matulog na og sayo karong gabii.
Gidugang pa ni Boter nga ang mas nakanindot kung mudonar og dugo tungod kay sa pag-interview pa lang, sama na nga nagpakunsulta ang usa ka indibidwal tungod kay sayron man ang iyang pnaka-ulahing estado sa panglawas pinaagi sa pagkuha sa ilang blood pressure ug uban pang medical test aron masayran kung mahimo bang makadonar og dugo.
Alayon niini, nanawagan si Boter ngadto sa tanan nga pahimuslan ang oportunidad nga makadonar og dugo ugmang adlawa ug ikonsiderang pinakamaayong regalo ngadto sa isig katawo karong holiday season.
Kini ilabina nga sa usa lang ka pagdonar og dugo, maluwas na sa usa ka blood donor ang duha ngadto sa tulo ka kinabuhi sa tawo.
