BUTUAN CITY- Malampusong nakatigom og 4,365 ka blood donors ang gipahigayong “Dugong Bombo 2026: A Little Pain, A Life to Gain” Blood Donation Drive niadtong Nobyembre 14, 2026, usa sa mga nag-unang programa sa Bombo Radyo Philippines Foundation, Inc. nga nagtumong sa pagtubag sa nagkadakong panginahanglan sa dugo sa mga Pilipino ug pagsiguro sa igo ug kasaligan nga suplay niini sa mga blood bank sa nagkalain-laing bahin sa nasud.
Narekord sa maong kalihokan ang kinatibuk-ang 1,964,250 cubic centimeters (cc) o katumbas sa 1,964.25 ka litro nga nakolektang dugo, nga mikabat usab sa 518.90 ka US gallons o 9.43 ka petroleum drums.
Ang maong bloodletting activity gipahigayon sa 25 ka importanteng lokasyon diin nahimutang ang 32 ka fully digitalized Bombo Radyo ug Star FM stations, pinaagi sa pakigtambayayong sa Philippine Red Cross.
Giila isip usa sa pinakadako ug pinakadaghang dugo nga bloodletting events sa nasud, ang Dugong Bombo nagpadayon sa pagdasig sa publiko nga moapil sa boluntaryong pagdonar og dugo isip konkretong pagpakita sa pagpakabana ug pagtabang sa isigka-Pilipino.
Pinaagi niini, gilaoman nga makatampo ang matag donor sa pagluwas sa kinabuhi sa mga pasyenteng nanginahanglan og dugo, ilabina sa panahon sa emerhensiya ug mga medikal nga panginahanglan. Ang maong kalihokan nagpasiugda usab sa kamahinungdanon sa panaghiusa ug boluntaryong serbisyo alang sa kaayohan sa komunidad.
