BUTUAN CITY – Naluwas ang usa ka pianistang empleyado sa cruise ship human kini nakit-an nga naglutaw ug naningkamot nga magpabiling buhi sa kadagatan, mga 20 milya kon 32 kilometro gikan sa baybayon sa California sa Estados Unidos.
Base sa mga report, nadiskubrehan sa duha ka mangingisda nga sila si Grant Garrett ug Sean Norton ang maong lalaki duol sa Catalina Island niadtong Sabado ug gituohang kapin siyam na ka oras na kining naglutaw-lutaw sa Pacific Ocean human mahulog gikan sa cruise ship.
Sigon sa mga mangingisda, mihunong dayon sila sa ilang sakayan ug gibawi ang ilang mga gamit sa pagpangisda aron maluwas ang lalaki dihang namatikdan nila nga tawo diay ang ilang nakita nga naglutaw sa dagat.
Gipadayag sa lalaki nga pianista siya sa 14-deck cruise ship nga Ovation of the Seas, nga gipanag-iya sa Royal Caribbean kinsa mapasalamaton tungod kay nagtuo siyang dili na siya makalahutay ug mamatay na sa dagat.
Gidala ang biktima sa ospital ug anaa sa stable condition o lig-on na ang kahimtang sa panglawas. Samtang, gikumpirma sa United States Coast Guard nga ilang gi-imbestigahan ang insidente human gitugyan sa mga mangingisda ang naluwas nga lalaki ngadto sa Newport Beach Lifeguards.
