BUTUAN CITY -Mibakwi si Dean Ralph Sarmiento sa iyang pag-atubang isip unang saksi sa defense team sa impeachment trial batok kang Bise Presidente Sara Duterte nga ipadayon sa Nobyembre 9.
Sa iyang gipagawas nga pamahayag kaganina, gibutyag ni Sarmiento nga human sa ma-ampingong pagtimbang-timbang, nakahukom siyang dili na mu-apil sa mga pagdungog tungod sa personal niyang desisyon aron mapreserbar ang kagawasan sa iyang akademikong pagtuon ug panukiduki sa constitutional law, ingon man ang pagkamatarong ug pagka-walay pinalabi sa iyang mga legal nga panglantaw ug opinyon.
Madumduman nga gilakip sa defense team ni Duterte si Sarmiento isip unang saksi nga gila-uman unta nga mupasabot sa mga legal ug constitutional principles nga may kalabutan sa Article II o alegasyon sa unexplained wealth batok sa bise presidente.
Gihangyo pa gani sa depensa ang Senate Impeachment Court nga magpagawas og subpoena aron ipatawag siya sa hearing sa Nobyembre 9.
Si Sarmiento usa ka propesor sa abogasya sa University of St. La Salle College of Law sa Bacolod City ug kaniadto usab nagsilbi isip vice chancellor for administration sa maong unibersidad.
Gipasabot niya nga wala niya damha nga ang iyang mga legal ug constitutional opinions nga gipatik sa social media nga magamit o ma-apil sa impeachment proceedings, hinungdan nga mas gipili niyang dili na motestigo aron mapabiling independente ug patas ang iyang mga akademiko ug legal nga panglantaw.
