-- ADVERTISEMENT --

BUTUAN CITY – Mi-abot sa 600 ka mga prisoners og war kon POWs ang gibuhian sa mga rebeldeng Houthis sa Yemen base sa pagkumpima sa International Committee of the Red Cross (ICRC).

Sigon sa International Committee of the Red Cross o ICRC, adiser ang pagbuhi kanila, gi-interbyu una sila sa ilang mga representante aron masuta ang ilang kahimtang, ilabina ang ilang panglawas.

Gihatagan usab sila og tabang aron masiguro ang luwas ug hapsay nilang pagpa-uli sa ilang mga pamilya.

Sigon sa ICRC, gisugdan ang pagbuhi sa National Committee for Prisoners Affairs sa Houthi kansa dili kabahin sa 2018 Stockholm Agreement nga nagtumong sa pagbayloay sa mga binilanggo tali sa magka-atbang nga kampo.

Wala usab manginlabot ang Red Cross sa pagpili kung kinsa ug pila ang mga tawong ipagawas. Samtang sumala ni Abdul Qader al-Murtaza, hepe sa Houthi National Committee for Prisoners’ Affairs, mokabat na sa 2,612 ang kinatibuk-ang gidaghanon sa mga dinetine nga ilang gipagawas pinaagi sa unilateral amnesty initiatives sukad nagsugod ang gubat sa Yemen.

-- ADVERTISEMENT --

Wala pa usab magpagawas og opisyal nga reaksyon ang gobyerno sa Yemen kalabot sa maong lakang. Gipasalig hinuon sa ICRC nga andam kini nga molihok isip neutral nga tigpataliwala sa umaabot nga mga operasyon alang sa pagpagawas, pagbalhin ug pagpabalik sa mga dinetine.

Ang gubat sibil sa Yemen nagsugod niadtong 2014 human makuha sa Houthi ang kontrol sa capital city nga Sanaa ug ubang mga lugar sa nasud. Misulod usab sa panagbangi niadtong 2015 ang koalisyon nga gipangulohan sa Saudi Arabia aron suportahan ang internasyonal nga giila nga gobyerno sa Yemen.