BUTUAN CITY – Mi-abot sa 30 ka mga lumolupyo sa lungsod sa Barobo, Surigao del Sur ang nakadawat og cash grants gikan sa Office of the Vice President (OVP) isip suporta sa pagsugod sa ilang tagsa-tagsa ka panginabuhian.
Tumong sa maong ayuda nga matabangan ang mga benepisyaryo nga makasugod og gagmay’ng livelihood initiatives nga mahimong tinubdan sa malungtarong kita o sustainable income generation.
Pinaagi niini, gilauman nga adunay dugang kahigayonan ang mga nakadawat sa pagpalambo sa ilang kahimtang sa panginabuhi ug pagpalig-on sa ilang kapasidad sa pagsuporta sa adlaw-adlaw nga panginahanglan sa ilang mga pamilya.
Nanguna sa pagpahigayon sa maong kalihukan si Rolmar’ Basalan, representante sa OVP Caraga Satellite Office, nga maoy mitabang sa pagpatuman sa programa sa maong lugar.
Gilauman nga magamit sa mga benepisyaryo ang nadawat nga pinansyal nga tabang isip puhunan sa ilang gustong sugdan nga gagmayng negosyo o uban pang kalihokan nga makahatag og regular nga kita.
Pinaagi sa maong inisyatiba, tumong sa OVP nga mapalapdan ang oportunidad sa mga lumulupyo nga makabarog sa kaugalingon, mapalambo ang ilang kahimtang sa ekonomiya ug adunay mas lig-on nga tinubdan sa panginabuhi alang sa ilang mga pamilya.
