BUTUAN CITY – Misalang sa witness stand si Chadrin Parian, taga-Las Piñas City, human gipresentar ni defense lawyer Justin Gular atol sa pagpadayon sa impeachment trial sa Senado ning adlawa, Huwebes.
Sa iyang testimonya, gihisgotan ni Parian ang ilang biyahe kauban si Atty. Manases “Mans” Carpio ngadto sa Kuala Lumpur, Malaysia niadtong Hunyo ning tuiga.
Lakip sa iyang giklaro ang pagpalit ni Carpio og mga Nike shoes ug uban pang sports apparel nga mikantidad og ₱256,882.50.
Sumala sa gipresentar nga impormasyon, gituyo ang maong mga gamit isip treat ug pasalamat sa mga batang miyembro sa Elite Basketball Team nga nakadaog sa kompetisyon nga ilang gi-apilan sa Malaysia kondiin ang mga atleta naggikan sa nagkalain-laing komunidad ug siyudad sa Pilipinas.
Dinhi na gipa-isa isa ni Atty Gular og pagpakita ang mga hulagway sa ilang mga lakaw aron ipamatuod nga tinuod ang maong lakaw apil ang pag-apil sa mga bata sa kompetisyon ug dili kay dinhi lang kini sa Pilipinas nahitabo nga daw maoy gustong ipagawas nga isyu sa prosekusyon.
Dinhi na mipadayag si house private prosecutor Reynaldo Robles nga mituo na sila nga tinuod ang pamahayag ni Parian.
Ang testimonya ni Parian kabahin sa presentasyon sa depensa aron matubag ang mga alegasyon sa impeachment complaint, ilabina ang mga pangutana kabahin sa giingong unexplained wealth ug mga transaksiyon nga giapil sa imbestigasyon.
Ang maong transaksiyon nahimong isyu atol sa miaging hearing human gilakip kini sa pag-analisar ni prosecution witness Atty. Alexander Cabrera sa mga pinansyal nga rekord nga may kalabotan sa Bise Presidente ug sa iyang bana.
