BUTUAN CITY- Dili matago sa P-pop group nga SB19 ang ilang kalipay ug katingala human maapil sa opisyal nga lineup sa mga artistang motambong ug motugtog sa sikat nga Coachella Music Festival 2027 nga ipahigayon sa Abril 9 hangtod 11 ug Abril 16 hangtod 18.
Sumala sa miyembro nga si Stell, kaniadto damgo lamang nila ang pag-apil sa maong internasyonal nga entablado, samtang giingon ni Pablo nga usa kini ka dakong katuparan sa ilang dugay nang pangandoy.
Gipasalig usab nila nga seryoso nilang pangandaman ang ilang pasundayag ug dili lamang motambong aron mamasyal, diin andam nang sugdan nila Justin ug Ken ang pagpangandam. Samtang, naglaum si Josh nga ang maong kalampusan mahimong inspirasyon sa kasamtangan ug umaabot nga henerasyon sa mga Pilipinong artist.
Lakip usab sa mga dagkong ngalan nga nanguna sa lineup sa Coachella 2027 ang beteranang singer nga si Madonna, Dua Lipa ug SZA.
