BUTUAN CITY – Dismayado ang youth leader sa lungsod sa Jabonga, Agusan del Norte nga si Cris Monoy human gipalig-on sa Korte Suprema ang Republic Act 12326 nga naglugway sa tulo ka tuig nga termino sa mga barangay ug sangguniang kabataan officials ngadto sa lima ka tuig gawas pa sa pagsibog sa eleksyon ngadto sa Nobyembre 2028.
Sa eksklusibong pakighinabi ning sibyahan, gipadayag ni Monoy nga nangandam na unta siya aron mudagan isip usa sa mga opisyal sa Sangguniang Kabataan apan napapas ang iyang mga plano tungod sa pagpagawas ni Pangulong Ferdinand Marcos Jr sa maong akta.
Dako matud pa ang iyang plano alang sa mga kabatan-unan sa ilang lungsod tungod kay magamit na unta niya ang tulo ka tuig niyang kasinatian isip board of director sa ilang Municipal Youth Development Council.
Gisaysay niini nga sulod sa maong katu-igan, daghan siya’g nakat-unan kalabot sa youth leadership, community involvement ingon man ang kamahinungdanon sa paghatag og oportunidad ngadto sa kabatan-unan aron makaserbisyo sa katilingban.
Hinuon, gitahod ni Monoy ang tumong sa maong balaud nga mapadayon ang mga programa sa gobyerno taliwa sa kamatu-uran nga kinahanglan usab untang tan-awon ang kamahinungdan sa pagbag-o og mga lider aron mahatagan og kahigayunan ang mga bag-ong lider nga makaserbisyo.
Mi-apela siya sa kadaghanan nga unta usbon na sa katawhan ang panglantaw nila kalabot sa Sangguniang Kabataan ug dili isipon nga kutob lang sila sa mga liga-liga.
