BUTUAN CITY – Pormal nang gidawat sa Singapore ang pagpangulo sa Association of Southeast Asian Nations (ASEAN) alang sa tuig 2027 atol sa closing ceremony sa ASEAN Summit and Related Summits 2026.
Sa iyang pagpapulong, gidayeg ni Singapore Prime Minister Lawrence Wong ang Pilipinas, ubos sa pagpangulo ni Pangulong Ferdinand Marcos Jr., tungod sa malampusong pagtuman niini sa responsibilidad isip ASEAN Chair karong tuiga.
Gitumbok usab niini ang temang “Deeper Integration at Wider Partnership” nga nagtumong sa pagpalig-on sa integrasyon ug kooperasyon tali sa mga miyembro sa ASEAN ug sa ubang internasyonal nga kaabag aron mapalapdan ang mga oportunidad, mapadayon ang kalinaw ug mapalig-on ang rehiyon.
Lakip sa nahisgutan niini ang nagkadako ang kompetisyon tali sa dagkong mga gahom sa kalibotan ug managlahing global economic order.
Gipasabot niini nga ang mga gubat ug kagubot bisan sa mga rehiyong layo sa Southeast Asia mahimong makaapekto direkta sa ekonomiya, suplay sa enerhiya, pagkaon ug panginabuhi sa katawhan sa ASEAN.
Busa, iyang giklaro nga kinahanglan magpabiling nagkahiusa ang mga miyembrong nasud ug palig-onon ang ilang kooperasyon.












