BUTUAN CITY – Gipadayag ni Kazem Gharibabadi, ang deputy foreign minister for legal and international affairs sa Iran nga dili maghulat ang ilang nasud nga unang mohimo og pag-atake ang Estados Unidos sa dili pa molihok aron depensahan ang kaugalingon.
Sigon ni Gharibabadi, nagduda sila nga posibleng gigamit lamang sa Washington ang diplomatikong panaghisgot aron makabaton og igong panahon samtang nag-andam alang sa laing pag-atake batok sa ilang nasud.
Gipunting usab sa opisyal nga naglisod na sila pagsalig sa Estados Unidos tungod sa mga nangaging panagbangi bisan pa sa pagpadayon sa negosasyon. Bisan pa niini, bukas gihapon ang Tehran sa diplomatikong kasulbaran, basta matuman ang mga kondisyon niini.
Ang maong pamahayag nagdugang sa kabalaka nga posibleng mosamot pa ang tensiyon tali sa duha ka nasud ug makapalapad sa panagbangi sa Middle East.












