-- ADVERTISEMENT --

BUTUAN CITY – Mipirma ang Department of Energy (DOE) ug ang gobyerno sa Japan sa usa ka importanteng kasabutan alang sa pagsugod sa pagtukod og strategic petroleum reserve o nasudnong reserba sa lana sa Pilipinas.

Gipangunahan nila Secretary Garin ug Japan Minister of Economy, Trade and Industry Ryosei Akazawa ang pagpirma sa Memorandum of Cooperation (MoC), nga nagtumong sa paggiya ug pagpadali sa pagtukod sa nasudnong reserba sa krudo.

Sumala ni DOE Secretary Sharon Garin, importante kini nga lakang aron masiguro nga andam ang nasud sa posibleng pagsamok o krisis sa global nga suplay sa lana.

Lakip sa kasabutan ang pagpalambo sa episyenteng sistema sa pagtipig sa lana, pagtimbang-timbang sa mga angay nga pasilidad ug pagtino sa malungtarong pamaagi sa pagpondo sa maong proyekto.

Dili lamang imprastraktura ang gihatagan og pagtagad sa kasabutan kondili lakip na ang pagbayloay sa teknikal nga kahibalo ug pagpalig-on sa kooperasyon tali sa duha ka nasud aron mapalambo ang kapasidad sa Pilipinas sa pag-atubang ug pagpahi-angay sa kalit nga pag-usab sa kahimtang sa global nga merkado sa lana.

-- ADVERTISEMENT --

Dugang ni Garin, nagpakita kini sa lig-on nga alyansa tali sa Pilipinas ug Japan alang sa dugay nga seguridad sa enerhiya, nga magpanalipod sa mga konsumidor, negosyo ug industriya batok sa kawala’y kasigurohan sa suplay sa lana.