BUTUAN CITY – Gihagit ni Pangulong Ferdinand “Bongbong” Marcos Jr. ang mga negosyante ug mga mamumuhunan sa Association of Southeast Asian Nations kon ASEAN nga magtinabangay aron mapalambo ang ekonomiya ug makamugna og dugang trabaho sa rehiyon.
Sa iyang pakigpulong atol sa ASEAN Business and Investment Summit 2026 nga gipahigayon sa Pasay City, giklaro sa Presidente ang kamahinungdanon sa responsable nga paggamit sa Artificial Intelligence o AI aron mapa-uswag ang negosyo ug ang mga serbisyong mahatag sa katawhan.
Sigon ni Pangulong Marcos, lakip sa mga prayoridad sa Pilipinas ang paggamit sa AI aron matabangan ang gagmay’ng negosyo sa pagpalapad sa ilang operasyon ug pagpa-uswag sa mga serbisyo sa panglawas.
Gi-awhag usab niya ang dagkong mga kompanya ug mga mamumuhunan nga suportahan ang gagmay’ng negosyo pinaagi sa pagpa-ambit sa kahibalo, teknolohiya ug mga oportunidad.
Gipasiguro usab sa Presidente nga magpadayon ang pakigtambayayong sa Pilipinas sa ubang mga nasud nga sakop sa ASEAN aron mapalig-on ang ekonomiya, makamugna og daghang trabaho ug mahatagan og mas maayong kaugmaon ang mga lumulupyo sa rehiyon.
