-- ADVERTISEMENT --

BUTUAN CITY -Pormal nang gisugdan karong adlawa ang 49th Association of Southeast Asian Nations kon ASEAN Summit nga himuon sa Manila kondiin magtigom ang mga lider sa mga nasud nga sakop sa ASEAN aron hisgutan ang nagkada-iyang isyu nga naghulga sa kalinaw, seguridad ug kalamboan sa rehiyon.

Gipangunahan kini ni Pangulong Ferdinand “Bongbong” Marcos Jr. isip chairman sa ASEAN 2026, ubos sa temang “Navigating Our Future, Together” sa Philippine International Convention Center kon PICC sa Pasay City.

Lakip sa mga nag-unang hisgutan sa tulo ka adlaw nga summit nga matapos karong Martes, Nobyembre 17, ang seguridad sa pagkaon ug enerhiya, kalig-on sa ekonomiya, proteksyon sa mga migrant workers, pakigbatok sa transnational crimes ug online scams, ingon man ang seguridad sa rehiyon taliwala sa nagpadayong tensiyon sa Middle East.

Gilauman usab nga hisgutan sa mga lider ang pagpatuman sa Five-Point Consensus alang sa pagsulbad sa krisis sa Myanmar, lakip ang pagpalig-on sa kooperasyon sa maritime security ug ang negosasyon alang sa Code of Conduct sa South China Sea.

Kagahapon, gisugdan ang mga serye sa meeting nga gitambungan sa nagkada-iyang mga lider sama sa pagbukas sa ASEAN Ministers Meeting nga gitambongan sa mga secretary o minister sa Foreign Affairs. Gisundan kini sa ASEAN Economic Community Council Meeting nga gipangunahan ni Trade and Industry Secretary Ma. Cristina Roque, kinsa naggpasalamat sa mga kaubanan niining ministers tungod sa ilang kooperasyon alang sa dungan nga pag-uswag sa ekonomiya sa Habagatan-sidlakang Asya.

-- ADVERTISEMENT --

Samtang ugmang adlawa Nobyembre 16 hangtod 17, magpadayon ang mga panagtigom tali sa ASEAN leaders ug ilang mga dialogue partners lakip ang Australia, China, India, Japan, South Korea, United Nations ug Estados Unidos.

Sa Nobyembre 17 usab ipahigayon ang 29th ASEAN Plus Three Summit ug 21st East Asia Summit, sa dili pa pormal nga itugyan sa Pilipinas ngadto sa Singapore ang pagpangulo sa ASEAN alang sa sunod nga tuig. Gilauman nga pinaagi sa maong panagtigom, mapalig-on ang panaghiusa ug kooperasyon sa mga nasud sa Southeast Asia aron maatubang ang nagkada-iyang hagit ug masiguro ang mas lig-on ug mauswagon nga kaugmaon sa rehiyon.