BUTUAN CITY- Nasikop sa gipahigayong buy-bust operation sa mga kapulisan ang usa ka giilang Street-Level Individual (SLI) ug nakumpiskar gikan niini ang 104.75 gramos nga gituohang shabu nga nagkantidad og 712,300 pesos, sa Purok 1, Barangay Ong Yiu, Butuan City, niadtong Nobyembre 8.
Giila ni Police Regional Office 13 Director PBGen. Rolindo Suguilon ang dinakpan nga si alyas “Cyclone,” 30 anyos, ug residente sa Purok 7, Barangay Bading, Butuan City.
Gipahigayon ang operasyon sa mga personahe sa Drug Enforcement Unit sa Butuan City Police Station 2, subay sa koordinasyon sa Philippine Drug Enforcement Agency–Agusan del Norte.
Gawas sa gituohang shabu, nakumpiskar usab sa mga operatiba ang mga plastik nga pakete nga adunay sulod nga ilegal nga droga, usa ka libo ka pesos nga marked money, itom nga sling bag ug cellphone.
Gidayeg usab ni Suguilon ang mga operatiba nga nalambigit sa operasyon ug gipasiugda nga nagpakita kini sa padayong paningkamot sa kapulisan sa Caraga Region sa pag-ila, pagsubay ug pagdakop sa mga indibidwal nga nalambigit sa ilegal nga patigayon sa droga.
