BUTUAN CITY- Mipasidaan ang World Health Organization (WHO), nga posibleng mo-abot sa kapin 39 milyon ka tawo sa tibuok kalibotan ang mahimong direkta nga mamatay tungod sa mga impeksiyong bakterya nga dili na matambalan sa kasagarang antibiotics pag-abot sa tuig 2050, tungod sa nagkadakong resistensya sa mga bakterya batok sa mga tambal.
Gipasiugda sa WHO atol sa pagsaulog sa World Antimicrobial Resistance Awareness Week nga nagkagrabe ang hulga sa mga impeksiyon nga kaniadto dali rang matambalan, apan karon naglisod na pagtubag sa antibiotic treatment, nga nagbutang sa peligro sa mga pasyente lakip na sa mga nagpa-anak, nagpailis og organo ug adunay laygay nga mga sakit.
Gibutyag usab sa taho sa WHO niadtong 2025 nga hapit usa sa matag unom ka kaso sa bacterial infection nga nakumpirma pinaagi sa laboratory test sa tibuok kalibotan ang resistante na sa antibiotics, ug padayon pa kining misaka.
Lakip sa mga nag-unang hinungdan niini ang sayop ug sobra nga paggamit sa antibiotics, kakulang sa epektibong pagpugong sa pagkaylap sa impeksiyon ug limitadong access sa angay nga tambal.












