BUTUAN CITY – Opisyal nang gi-nominate sa mga Democrats sa United States House of Representatives si Hakeem Jeffries isip ilang kandidato pagka-Speaker of the House, nga maghatag kaniya og higayon nga mahimong unang Black American nga magdumala sa maong kapulungan sa Kongreso. Pili-on ang bag-ong Speaker of the House sa Enero 3, sunod tuig sa pagsugod sa sunod nga termino sa Kongreso, diin ang mga Democrats na ang mokontrol sa mayoriya sa kapulungan.
Gila-uman nga makuha ni Jeffries ang maong gamhanang posisyon kansa mao ang ikaduha sa linya sa succession sunod sa bise presidente aron mopuli sa presidente kung dili na kini makahimo sa iyang katungdanan.
Kung mapili, mangulo si Jeffries sa pinakadakong mayoriya sa mga Democrat sa House sulod sa daghang katuigan, samtang kontrolado usab sa ilang partido ang Senado.
Human sa botasyon, gihulagway ni Jeffries ang iyang nominasyon isip usa ka dakong dungog ug talagsaong pribilehiyo.
Hangtod kaganina, mokabat na sa labing menos 257 ka lingkoranan ang makuha sa mga Democrat sa House of Representatives sa sunod nga tuig, nga labaw kaayo sa 218 ka lingkoranan nga gikinahanglan aron makontrol ang mayoriya.
Apan aduna pay pito ka electoral race sa mi-aging midterm elections ang wala pa opisyal nga mahibaloi ang resulta. Si Jeffries, nga nagrepresentar sa usa ka distrito sa New York, napili pag-usab isip lider sa partido pinaagi sa 251 batok sa 11 ka boto atol sa closed-door voting niadtong Miyerkules.
Nagserbisyo na siya isip minority leader sukad sa 2023. Samtang, giklaro sa Congressional Black Caucus, nga gilangkoban sa mga miyembro sa Democrat sa House of Representatives, ang makasaysayanong kahigayunan nga mahimong unang Black American si Jeffries nga mangulo sa maong kapulungan.
Matod ni Congressional Black Caucus Chair Yvette Clarke, dako ang pagsalig nga gihatag sa katawhang Amerikano ngadto kanila, ilabina sa suporta ug partisipasyon sa mga komunidad sa Black Americans sa habagatang bahin sa nasud.
Dugang pa ni Clarke, responsibilidad na nila karon nga buhaton ang tanan aron matuman ang gisalig sa katawhan ug mapamatud-an ang ilang pagsalig sa ilang pagpangulo.












