-- ADVERTISEMENT --

BUTUAN CITY – Gipahibalo ni Myanmar President Min Aung Hlaing nga susihon pag-usab sa iyang administrasyon ang umalabot nga relasyon sa Association of Southeast Asian Nations (ASEAN), human niya gibatikos ang gika-ingong dili patas nga pagtratar sa rehiyonal nga organisasyon ngadto sa ilang nasud.

Gihimo niya ang pamahayag atubangan sa kapin 540 ka mga magbabalaod ug opisyal sa Naypyitaw, diin iyang gisaway ang ASEAN tungod sa padayon nga pagpanaway sa kakulang sa progreso sa Myanmar sa pagpatuman sa five-point peace plan alang sa kalinaw sa nasud.

Gihulagway ni Min Aung Hlaing nga dili makatarunganon ang baruganan sa ASEAN dayong butyag nga kini nagrepresenta lamang sa personal nga opinyon sa pipila ka lider imbes nga hini-usang desisyon sa tanang miyembro.

Iya usab nga gi-akusahan ang ASEAN sa pagpahamtang og political pressure ug pagpakaulaw sa Myanmar.

Bisan pa niini, gipasalig niya nga ipadayon gihapon sa Myanmar ang pakigtambayayong sa tagsa-tagsa ka mga miyembro sa ASEAN ug magpahigayon og peace conference sa Pebrero aron makab-ot ang malungtarong kalinaw.

-- ADVERTISEMENT --

Kahinumdoman nga nahimulag ang Myanmar sa daghang internasyonal nga kalihokan ug wala tugoti ang mga taas nga opisyal sa militar nga mutambong sa dagkong tigum sa ASEAN sukad sa 2021, human gi-ilog sa militar ang gahom gikan sa administrasyon ni Aung San Suu Kyi