BUTUAN CITY- Giawhag sa Commission on Population and Development-Caraga kon CPD-13 ang mga lokal nga panggamhanan sa rehiyon nga dugangan ug palig-onon ang pamuhunan sa mga programa alang sa kahimsog ug kaayohan sa mga tin-edyer tungod sa nagpabiling taas nga ihap sa mga mabdos nga menor de edad bisan pa sa paghinay sa pagtubo sa populasyon sa Caraga. Base sa taho mikabat sa 58 ka batang babaye nga ubos sa 15 anyos ug 3,648 ka tin-edyer nga nag-edad og 15-anyos hangtod 19-anyos ang naburos, kansa bugti sa aberids nga 309 ka adolescent pregnancies matag bulan sa rehiyon.
Matod ni Omega, daghang hinungdan ang nakaamot niini, lakip ang mga impluwensiya sa kultura, pag-usab sa pamatasan bahin sa pakighilawas sa dili pa ang kaminyoon ug kakulang sa access sa mga serbisyo nga makatabang sa pagpugong sa dili planadong pagmabdos.
Tungod niini, giawhag sa CPD-13 ang mga LGU nga magtukod og mga Teen Center nga mahimong luwas nga lugar alang sa mga tin-edyer diin makadawat sila og edukasyon, giya ug uban pang serbisyo, ingon man palig-onon ang mga programa sa Sangguniang Kabataan ug ang mga lokal nga opisina sa populasyon ug kalamboan aron mas matutukan ang panginahanglan sa mga kabatan-onan.
Dugang pa ni Omega, gipaagi na sa pagbansay ang kapin 90 ka population officers gikan sa nagkadaiyang probinsya sa Caraga aron mapalambo ang mga lokal nga programa ug pamaagi sa pagsulbad sa nagkadaghang kaso sa pagmabdos sa mga teen-ager.












