-- ADVERTISEMENT --

BUTUAN CITY – Gikumpirma ni Police Brigadier General Allen Rae Co, hepe sa Public Information Office sa Philippine National Police (PNP), nga nakasubmite na og mga reklamong kriminal batok kang Thomas Markle Sr., amahan sa American actress ug Duchess of Sussex nga si Meghan Markle.

May kalambigitan kini sa mga materyales nga gika-ingong nagpakita og seksuwal nga pagpang-abuso ug pagpahimulos sa mga menor de edad nga narekober sa iyang kanhi gipuy-an sa Cebu.

Sumala sa PNP, ang Women and Children Protection Center (WCPC) – Visayas Field Unit maoy nagsumite sa reklamo ngadto sa Office of the Provincial Prosecutor sa Cebu niadtong Nobyembre 16.

Lakip sa mga alegasyon ang paglapas sa Republic Act 11930 nga mas nailang Anti-Online Sexual Abuse or Exploitation of Children ug Child Sexual Abuse or Exploitation Materials Act.

Gibase ang reklamo sa mga ebidensiyang nakuha sa mga electronic devices ug uban pang gamit nga gisurender sa anak ni Thomas Markle nga si Thomas Markle Jr. ngadto sa mga awtoridad.

-- ADVERTISEMENT --

Sumala sa report, mokabat sa 7,500 ka mga litrato ug usa ka video nga nagpakita sa mga menor de edad ang narekober sa mga device nga nalambigit sa imbestigasyon.

Dugang ni Co, gipa-ilalom na sa evaluation ug case build-up ang mga reklamong gisubmite, samtang nagpadayon ang digital forensic examination sa ubang mga devices aron masuta ang dugang nga ebidensiya nga mahimong gamiton sa kasong gisang-at o basehan sa posibleng dugang nga reklamo.

Ang 82-anyos nga si Thomas Markle Sr., una nang gidakop sa mga awtoridad sa Estados Unidos sa Florida niadtong Nobyembre 6 tungod usab sa laing alegasyon sa pagpanag-iya og child sexual abuse materials apan iyang gilimod ang mga alegasyon batok kaniya.

Gikinahanglan pa nga susihon sa piskaliya ang mga ebidensiya aron matino kung aduna ba’y igo nga basehan sa pagpadayon sa kaso ngadto sa korte.