BUTUAN CITY – Duda ang IBON Foundation kung tinud-anay nga makabenepisyo ang ekonomiya sa Pilipinas sa mga kasabutan nga namugna atol sa 49th Association of Southeast Asian Countries kon ASEAN Summit ilabina nga grabe kadako sa pundong gigahin sa gobyerno alang lamang sa hosting niini.
Sigon ni IBON Foundation Executive Director Jose Enrique ‘Sonny’ Africa, dili klaro kung sa unsang paagi makatabang sa ekonomiya sa nasud ang mga nasabutan sa digital economy kalabot sa pamatigayon ug sa reginal integration.
Gikwestyon usab ni Africa ang pundong gigahin alang sa ASEAN 2026 nga mi-abot sa 22.9-bilyunes pisos nga gitagana alang sa mga ASEAN activities ning tuiga.
Nabalaka siya nga posibleng mas magsalig lang ang Pilipinas sa langyaw’ng teknolohiya ilalom sa AI roadmap inay nga palambuon ang kaugalingong kapasidad sa artificial intelligence ug semiconductors.
Gikwestyon usab niya ang kasabutan alang sa critical minerals ug supply chains tungod kay posibleng mas makapahimulos niini ang mga langyaw’ng kompanya sa mga rekursos naturales sa rehiyon kung dili gihapon mapakusgan sa mga membrong nasud sa ASEAN ang ilang kaugalingong industriya.












