-- ADVERTISEMENT --

BUTUAN CITY – Init nga gidawat ni Pangulong Ferdinand Marcos Jr. si United States President Donald J. Trump sa Malacañang Palace kaganinina kondiin gisaulog sa Pilipinas ug Estados Unidos ang ika-80 nga anibersaryo sa ilang diplomatikong relasyon ug ang ika-75 nga anibersaryo sa Mutual Defense Treaty.

Nahasubay kini sa pag-apil ni Trump sa closing ceremonies sa ASEAN-US Special Summit ubos sa pagpangulo sa Pilipinas sa ika-49 nga Association of Southeast Asian Nations kon ASEAN Summit and related summits.

Sa iyang pagpamulong, gipadsalig ni Trump ang pagpalig-on pa sa kooperasyon sa depensa tali sa duha ka nasud ug ang pagpahibalo ni Trump nga posibleng magtinabangay ang duha ka nasud sa usa ka dakong proyekto sa natad sa enerhiyang nukleyar, bisan wala pa siya maghatag og dugang detalye bahin niini.

Gipadayag usab niini nga gipadako sa Washington ang suporta militar sa Pilipinas ug gi-aprubahan ang kapin sa 5 bilyones dolyares nga baligya sa mga armas dinhi sa nasud.

Gihisgutan usab niya ang posibilidad nga mahimong kauban ang Pilipinas sa giplanong proyekto sa pag-eksport og natural gas gikan sa Alaska.

-- ADVERTISEMENT --

Ang Estados Unidos, gi-ila nga labing karaan ug bugtong ka-alyado sa Pilipinas nga adunay kasabotang pangdepensa.

Gibase ang ilang relasyon sa nag-unang mga kasabutan sama sa Mutual Defense Treaty o MDT, Visiting Forces Agreement o VFA, ug Enhanced Defense Cooperation Agreement o EDCA.

Gawas sa depensa ug seguridad, nagpabiling lig-on ang relasyon sa patigayon ug ekonomiya sa duha ka nasud.

Niadtong tuig 2025, nahimong ikatulong pinakadakong trading partner sa Pilipinas ang Estados Unidos ug mao usab ang pinakadakong merkado sa eksport sa nasud, diin miabot sa 21.6 bilyong dolyar ang kinatibuk-ang bilateral trade sa duha ka nasud.