BUTUAN CITY – Gikumpirma ni Atty. Salvador Paolo Panelo Jr., tigpamaba ni Vice President Sara Duterte, nga luwas nang nakuha ang duha ka kanhi household staff sa Bise Presidente pinaagi sa tabang sa iyang legal team ug sa kapulisan kagahapong adlawa Martes.
Base sa sinulat nga pamahayag sa duha ka kanhi kawani nga gipagawas ni Panelo karong adlawa, gika-ingong gi-recruit sila sa usa ka pribadong indibidwal niadtong Oktubre aron motrabaho sa usa ka resort sa Boracay, apan gidala hinuon sila sa Manila sa pasangil nga ipaagi og training.
Pag-abot sa Nobyembre 16, gipahibalo matud pa sila sa ilang employer nga nameligro ang ilang kinabuhi, lakip na ang kinabuhi niini tungod sa pag-amuma kanila ug gi-ingnan usab sila nga mawala lamang ang maong hulga kung mopirma sila sa mga affidavit kon panumpaang pamahayag nga gika-ingong adunay bakak nga mga alegasyon batok kang Duterte.
Gibalibaran sa duha ang pagpirma sa maong mga dokumento.
Bisan pa og giklaro nilang wala sila prisuha, nagpabilin sila ubos sa kustodiya sa ilang employer tungod sa kahadlok hangtod mihangyo na sila og tabang ngadto sa Bise Presidente.
Diha-diha usab nga gisundo sa legal team ni Duterte ug sa mga pulis ang duha kagahapon Martes ug gidala sa estasyon sa kapulisan aron maghimo og affidavit ug gipa-blotter ang insidente.
Sigon sa kampo sa Bise Presidente, napugngan ang gika-ingong plano nga gamiton ang duha ka kanhi kawani aron maghatag og peke nga testimonya batok kang Duterte ug wala na muhatag pa og dugang detalye aron masiguro ang kaluwasan sa tanang nalambigit.












