-- ADVERTISEMENT --

BUTUAN CITY- 17 ka indibidwal ang namatay sa duha ka managlahing insidente sa pagpamusil sa South Africa niadtong Domingo, Nobyembre 15.

Walo ang nangamatay human gipusil sulod sa usa ka minibus nga adunay pito ka lingkoranan sa probinsya sa KwaZulu-Natal, diin nadiskobrehan sa kapulisan ang sakyanan nga puno sa mga bala ug ang mga lawas sa walo ka lalaki nga namatay na sa sulod niini.

Pipila ka oras ang milabay, laing pagpamusil na usab ang nahitabo sa usa ka barung-barong sa Atteridgeville, western Pretoria, nga miresulta sa kamatayon sa siyam ka tawo, lakip ang unom ka lalaki ug tulo ka babaye.

Sumala sa kapulisan, walay kalambigitan ang duha ka insidente, apan padayon ang imbestigasyon aron matino ang motibo sa mga pagpamusil ug mailhan ang mga responsable niini.

Gilusad na usab ang manhunt aron madakpan ang mga suspek, samtang gikonsiderar nga dili bag-o sa nasud ang mga insidente sa pagpamusil tungod aduna na usab kiniy susamang mga kaso nga natala niadtong miaging mga bulan, lakip na sa bulan sa Septiyembre.

-- ADVERTISEMENT --