BUTUAN CITY – Karong nagkaduol na ang deadline sa negosasyon tali sa Canada ug Estados Unidos kabahin sa bag-ong trade deal, gibutyag ni Canada-US Trade Minister Dominic LeBlanc nga padayon pa ang ilang pagtrabaho uban sa mga opisyal sa Estados Unidos ug wala pa mahuman ang trabaho.
Gihisgutan sa duha ka nasod ang posibleng pagpa-ubos sa mga taripa sa US sa Canadian steel ug aluminium gikan sa 50% ngadto sa 25%, ug sa mga sakyanan gikan sa 25% ngadto sa 15%.
Sa laing bahin, gikonsidera sa Canada ang paghatag og mas dako nga access sa ilang merkado alang sa American dairy products, pagpasig-uli sa pagbaligya sa American alcohol, ug pagtangtang sa ilang retaliatory tariffs batok sa US.
Samtang gipadayag ni US President Donald Trump nga nagpadayon sa maayong direksyon ang negosasyon, apan wala pa makumpirma ang pinal nga kasabutan. Matod usab sa Conservative opposition leader Pierre Poilievre, dili maayong deal kung ang mga taripa mahimong dili patas ug pabor lamang sa usa ka nasod.
