BUTUAN CITY – Dakong garbo alang sa Butuanon nga si Lembert Neil Ayta nga iyang irepresenta dili lang ang dakbayan sa Butuan ug Caraga Region kondili ang entiro Pilipinas sa himuong Model of the Year International 2026 nga himuon sa Sri Lanka karong Oktubre ning tuiga.
Sa eksklusibong pakighinabi sa Bombo Radyo Butuan, gipadayag niining nariyalisar kini human siya gikoronahan isip Modelo Turismo Mindanao 2026 niadtong Agusto 9 sa Jasaan, Misamis Oriental.
Iyang napildi ang laing 40 ka mga male candidates gikan sa nagkada-iyang siyudad ug lalawigan sa Mindanao human usab niya mapasigarbuhong napakita ang kultura, mga tourism sites ug sapot sa siyudad uban sa suporta sa City Tourism Office.
Samtang gipadayag usab sa pageant designer ug nagsilbi niyang manager nga si Klevin Bartolaba nga nangandam na sila karon alang sa international pageant ilabina nga dili lang ang Mindanao ang irepresenta ni Ayta sa Sri Lanka kondili ang entiro Pilipinas.
Karon pa lang, padayon ang ilang pagpangandam aron masiguro nga makita sa intertenational stage kung unsa ang dakbayan sa Butuan ilabina ang istilo sa pagpanapot sa mga karaang Butuanons, kultura ug turismo.
Dili matud pa angayang kumpyansahan ang umalabot nga male pageant tungod kay capable usab pagsakmit sa Model of the Year International 2026, ang mga representante sa ubang kanasuran.
