BUTUAN CITY – Giklaro ni Kabataan Partylist Rep Renee Louise Co nga bisan pa sa panahon kaniadto ni kanhi Rep Raoul Manuel, daan na kining misupak sa pag-apruba sa 2024 ug 2025 budget ka-uban ang lain pang sakop sa Makabayan bloc nga sila kanhi Rep France Castro ug Arlene Brosas.
Sa eksklusibong pakighinabi sa Bombo Radyo Butuan, gipadayag sa kongresista nga kini tungod na usab sa padayong pagpundo sa mga pork barrel schemes ug pagpamugos sa unprogrammed appropriations nga maoy gideklara sa Korte Suprema nga unconstitutional.
Dugang pa ni Rep Co, bisan pa sa mga pagsupak ug expose sa Makabayan bloc, wala gihapon ma-usab ang sistema bisan sa proposed 2027 national budget.
Gipasabot pa niini nga ang kaniadto kontrobersyal nga ‘Small Committee’ nga gihulipan og Budget Amendment Review Sub-Committee kon BARSC aron unta maoy muproseso sa gisubmiteng mga amendments sa mga magbabalaud, wala gihapon misunod sa kaugalingon niining patakaran rason nga anaa gihapon ang mga hard ug soft porks.
Dugang pa ni Rep Renee Co, nga ang desisyon sa Korte Suprema wala lamang naglimita sa mga legislative enactments kon pag-amenda sa mga unprogrammed appropriations kansa maoy midako og maayo niadtong 2024 ug 2025, kondili apil sa patubagon niini ang mga chief implementers sa Malakanyang.
Kini tungod na usab sa mga programa ug sa budget nga maoy rason nga gisusi gayod nila og maayo sa Makabayan bloc ang gusto nga mga proyekto sa mga cabinet members ug sa mga ka-ubanan nilang mga kongresista ilabina kadtong vulnerable gayod sa kurapsyon.
