BUTUAN CITY – Gipangandam na sa Siargao, Surigao del Norte ang pag-abot sa mga world-class surfers nga mosulay sa sikat nga balod sa Cloud 9 alang sa World Surf League Philippines Pro Championship Tour, nga himuon gikan Oktubre 31 hangtod Nobyembre 10 ning tuiga.
Kini ang unang higayon nga ang Pilipinas maoy mag-host sa prestihiyosong surfing competition, diin motambong ang pipila sa labing maayong surfers gikan sa nagkalain-laing nasod ug makiglumba sa iladong reef break sa Siargao.
Gila-uman nga mahimong sentro sa kompetisyon ang Cloud 9, usa sa pinakasikat nga surfing destinations sa nasud, diin atubangon sa mga atleta ang dagkong balod ug lisod nga kondisyon sa kadagatan.
Manguna sa men’s division ang Brazilian surfer nga si Yago Dora, ang kasamtangang World No. 1, nga mosulay sa pagpakita sa iyang consistency batok sa pipila sa pinakakusgan nga surfers sa kalibotan.
Lakip usab sa moapil ang mga kanhi World Champions nga sila Gabriel Medina ug Italo Ferreira, nga parehong gikan sa Brazil ug ilado sa ilang agresibo ug impresibong estilo sa surfing.
Alang sa Siargao ug Surigao del Norte, gilauman nga mahimong dakong oportunidad ang maong international competition aron mas mapaila pag-ayo sa tibuok kalibotan ang Cloud 9 ug ang surfing culture sa isla, samtang mapalambo usab ang lokal nga turismo ug ang Pilipinas isip destinasyon alang sa world-class surfing events.
