BUTUAN CITY- Nagpadayon ang Estados Unidos sa ikaupat nga sunod-sunod nga adlaw sa airstrikes batok sa Iran, diin sumala sa U.S. Central Command, gitarget ang mga pasilidad nga giingong gigamit sa Iran sa pag-atake sa mga komersiyal nga barko sa Strait of Hormuz, samtang gipatuman pag-usab ang naval blockade batok sa mga pantalan sa Iran.
Giakusahan sa Tehran ang Washington nga nilapas sa miaging kasabutan sa temporaryong hunong buto, ug giingong naigo sa mga airstrike ang Qeshm Island, Bushehr, ug ubang mga lugar duol sa utlanan sa Iraq ug Kuwait.
Isip tubag, miatake usab ang Iran sa mga barkong pandagat sa Amerika sa Strait of Hormuz nga miresulta sa kamatayon sa duha ka tripulante, samtang nadaot usab ang usa ka Norwegian oil tanker ug naigo ang usa ka war ship sa Kuwait nga nakaangol sa upat ka tripulante.
Bisan pa sa nagkagrabeng tensyon sa rehiyon, gipahibalo ni U.S. President Donald Trump nga dili na ipadayon ang plano sa pagpahamtang og toll fee sa mga barkong moagi sa Strait of Hormuz ug pulihan kini sa mga kasabutang pangkalakalan ug pamuhunan uban sa mga kaalyado sa Gulf region, samtang nagpasidaan si Israeli Prime Minister Benjamin Netanyahu nga motubag dayon ang Israel kon maglunsad og pag-atake ang Iran batok sa nasud.
