BUTUAN CITY -Nagpakita og kusog ug disiplina ang koponan sa Estados Unidos human nila mapilde ang Australia, sa iskor nga 2-0, sa ilang ikaduhang duwa sa Group D match Seattle sa FIFA World Cup 2026.
Bisan wala ang ilang star player nga si Christian Pulisic tungod sa injury, nakontrolar sa mga Amerikano ang dagan sa duwa ug napugngan ang Australia sa paghimo og seryosong hulga sa goal.
Nakuha sa USA ang ilang unang puntos pinaagi sa usa ka own goal sa depensa sa Australia sa unang bahin sa duwa, samtang giselyohan ni Alex Freeman ang kadaugan pinaagi sa ikaduhang goal sa ulahing minuto.
Ang resulta naghatag sa Estados Unidos og importante nga tulo ka puntos ug nagpahiluna kanila isip usa sa mga paborito nga mosulod sa knockout stage gikan sa Group D, samtang napugos ang Australia nga manginahanglan og maayong resulta sa ilang sunod nga mga duwa aron mabuhi ang ilang kampanya sa World Cup.
