BUTUAN CITY – Nakakolektang sinako-sakong basura ang gipahigayon nga Clean Up Drive sa Surigao City isip kabahin sa World Environment Day.
Gipangulohan sa Lokal nga Gamhanan sa Surigao pinaagi sa City Environment and Natural Resources Office (City ENRO) ang nasangpit nga Coastal Clean-up Drive.
Dungan nga nagpaputi ug nanglimpyo ang mga personahe sa City ENRO ug nagkalain-laing sektor isip kabahin sa pagsaulog sa World Environment Day ug Philippine Environment Month.
Katuyuan sa maong kalihokan nga mapalig-on ang environmental awareness, maaghat ang komunidad sa pagpangga sa kinaiyahan, ug mapatigbabaw ang pagkahiusa aron mapabilíng limpyo ug luwas ang palibot.
Sa gipahigayon nga clean-up drive sa nagkalain-laing coastal barangay, miabot ngadto sa 85 ka sako nga residual waste ang nakolekta, gawas niini, pito ka sako sa mga recyclable material ang nakuha ug napuno usab sa biodegradable ang usa ka extra-large garbage bag.
Misalmot sa maong clean-up ang City Government Departments, Department of Environment and Natural Resources kon DENR provincial environment and natural resources office, Bureau of Jail Management and Penology kon BJMP, kapulisan, Parole and Probation Office, mga kompanya sa minahan og uban pa.
Alayon niini padayong nanawagan ang LGU Surigao sa publiko nga protektahan ang kinaiyahan pinaagi sa responsable nga paglabay sa basura.
