BUTUAN CITY- Kampante si Manila 3rd District Rep. Joel Chua nga dili magpadala sa bisan unsang political pressure ang mga magbabalaod, subay sa ilang gikinahanglan nga desisyon sa duha ka impeachment complaints batok kang Vice President Sara Duterte.
Kini samtang nagkaduol ang 2028 Presidential Elections kung asa usa ang Bise Presidente sa mga gikatakdang mokandidato sa pagka-Presidente. Sa pakighinabi sa Bombo Radyo kang Chua, gibutyag niini nga paniguradong gikonsidera na sa daghang magbabalaod ang posibleng mahimong resulta sa 2028 elections, kauban na ang pagka-frontrunner ni VP Sara.
Bisan paman, kinahanglan matud pa nga mopili ang mga magbabalaod kung magpadala sila sa kahadlok ug paglabalaka sa 2028 o kung iduso ug suportahan ang pagpalagpot sa Bise Presidente, karun nga mas mingtin-aw na ang partisipasyon ni VP Sara sa mga alegasyong gibato batok kaniya.
Nagtuo ang magbabalaod nga sa kataposan pagabasehan gihapon sa mga magbabalaod ang mga ebidensiyang giyagyag o ipakita sa gikatakdang hearing ug kung magpadayon kini sa Senado, mao matud pa kini ang mahimong basehan sa mga Senador kansa magsilbi isip judges.
