BUTUAN CITY – Padayon pang gi-validate sa Land Transportation Office kon LTO-Cabadbaran City extension office ang nag-viral nga video post ni PCol Wilson Sardea sa Highway Patrol Group nga nag-awhag sa publiko nga dili na paliton ang mga sakyanan ilabina ang mga luxury vehicles nga ibaligya kanila kung nakarehistro sa pipila ka mga buhatan sa Land Transportation Office o kaha extension offices niini kondiin na-apil niini ang ilang extension office sa Cabadbaran City.
Madumdumang sa maong video, gipasabot ni Sardea nga kini tungod sa mga kaso sa anomalya ug fake registrations nga nadiskubre sa Highway Patrol Group (HPG) ug LTO mismo.
Ang rehistro matud pa nga gikan sa pipila ka mga extension offices, mahimong ideklarang invalid rason nga dili dawaton sa LTO main office. Kini ilabina sa posibilidad nga ang sakyanan mahimong na-apil sa operasyon batok sa colorum o fake registrations nga kung madakpan, duna’y multa nga ₱10,000 ug i-impound unya hangtod ma-klaro ang legal nga status sa rehistro.
Samtang gipadayag ni Darapa nga sa tulo ka buwan niyang paglingkod isip hepe sa LTO-Cabadbaran City extension office, wala siya makadawat og reklamo nga duna’y kalambigitan sa maong alegasyon kansa seryuso kaayo.
Musulat matud pa siya sa ilang rehiyunal nga buhatan aron maklaro ang mga records sa mga sakyanan nga posibleng subject sa alegasyon ni Sardea.
