BUTUAN CITY – Miluwat na usab si Rossana Fajardo isip commissioner sa Independent Commission for Infrastructure (ICI), epektibo sa Disyembre 31, 2025.
Sa iyang gipagawas nga sulat-pamahayag, wala niya hisgoti ang hinungdan sa iyang desisyon ug wala usab siya’y gihatag nga detalye kung kinsa ang temporaryong mopuli sa iyang posisyon.
Gitawag ni Fajardo ang iyang pag-resign nga “courtesy resignation” sunod kang kanhi Sec. Rogelio Singson, usa usab ka commissioner sa ICI, gitumong aron maghatag og luna sa bisan kinsang itudlo sa appointing authority.
Madumdumang ang ICI gitukod niadtong Septembre ning tuiga aron muhimo og hugot ug lawom nga pagrepaso sa dagkong mga proyekto sa imprastruktura, ilabina sa kontrobersyal nga mga flood control program nga nalambigit sa mga alegasyon sa korapsyon.
Tungod sa sunod-sunod nga pag-resign sa mga naglangkob sa ICI, mitumaw karon ang kabalaka mahitungod sa abilidad sa komisyon nga magpabiling lig-on ug epektibo sa pagbantay sa mga proyekto sa gobyerno.
Ang mosunod nga lakang sa pamunuan sa pagtudlo og ipuli kanila, mahimong kritikal sa kredibilidad sa ICI.
