BUTUAN CITY – Gikumpirma ni Pangulong Ferdinand ‘Bongbong’ Marcos Jr nga pito na sa 16 ka mga indibidwal nga duna’y arrest warrant gikan sa Sandiganbayan ang naaresto ug anaa na sa ilang kostudiya.
Sa iyang gipagawas nga video statement kalabot sa update sa iyang kampanya batuk sa lapad nga kurapsyon sa gobyerno, gipadayag sa pangulo nga ang usa nga gikasuhan sa anti-graft court, gi-aresto sa National Bureau of Investigation (NBI) samtang ang unom, boluntaryo nga misurender sa Criminal Investigation and Detection Group (CIDG).
Samtang duna matud pa’y dugang duha ka akusado ang nagpadayag na sila sa ilang intensyon nga mosurender ug kasamtangan nga nakig-koordinar sa PNP–CIDG.
Madumdumang mi-abot sa 16 ka tawo ang gi-akusahang nalambigit sa anumalusong flood control projects kondiin apil na niini si kanhi Ako Bicol Representative Zaldy Co, nga gika-ingong nalambigit sa budget insertions alang sa mga proyekto.
Tungod niini nga kalambuan, pito na lang ang nagpabiling at-large ug gipanawagan na sa pangulo nga mosurender na aron dili na magdugay ang proseso.
Pahimangno sa presidente, wala’y espesyal nga pagtratar sa mga akusado ug sila magpabilin sa kustodiya sa NBI samtang naghulat sa kamanduan sa korte.
