BUTUAN CITY – Mikabat na ngadto sa kapin 44,000 ka mga residente ning siyudad sa Butuan City ang apektado sa Bagyong Uwan. Base sa report sa City Disaster Risk Reduction and Management Department (CDRRMD), miabot sa 33 ka barangay sa dakbayan ang apektado sa bagyo tungod sa kadaot nga hatud sa mga pagbaha, rain-induced landslide, coastal flooding, ug mga kahoy nga natumba sa pipila ka lugar.
Sa kinatibuk-ang 44,317 ka apektadong residente samtang 3,615 ka mga pamilya kon 13,309 ka mga indibidwal ang napugos pagbiya sa ilang mga panimalay.
Sa maong gidaghanon, 3,496 ka pamilya kon bugti sa 12,801 ka mga indibidwal ang nagpasilong sa mga evacuation centers, samtang 119 ka pamilya kon 508 ka mga indibidwal ang temporaryong nagpuyo sa ilang mga paryente.
Bisan pa nga adunay mga pamilya nga nakabalik na sa ilang mga balay, gihangyo gihapon sa Lokal nga Panggamhanan sa Butuan ang tanan nga magpabiling alerto.
