BUTUAN CITY – Gikumpirma ni PLCol Mariano Lukban, hepe sa Surigao City Police Station nga mi-abot sa 3.5-milyunes pisos nga kumpirmadong shabu ang nakumpiska sa gilusad nga joint anti-drug operation, batuk sa tulo ka mga high-value drug personalities human nakumpiska gikan kanila ang 500-gramos sa maong epektos.
Natigayon kini kagahapon sa alas-2:50 sa kaadlawon sa Purok 1, Barangay Canlanipa, sa maong siyudad. Naila ang mga dinakpan nga sila Benjie Camillotes Salibay, 47-anyos, residente sa Brgy Canlanipa ug lumad nga taga-Barangay Ipil; Rodney Nellas Bilagantol, 35-anyos, wala’y trabaho ug residente sa Purok Convention, Capitol Road, Barangay Washington ug Edward Cayumo Degamon, alias Kabaw, 37-anyos, tricycle driver, residente sa Barangay Luna, parehong sakop sa Surigao City.
Sa eksklusibong pakighinabi sa Bombo Radyo Butuan, gibutyag sa opisyal nga halos usa ka buwan na nilang gipanid-an ang mga responsable ilabina ang main subject nga si Salibay tungod sa ka-idlas niini.
Dugang ni Lieutenant Colonel Lukban, ang mga naaresto gikonsiderang high-value individuals tungod kay pareho silang nangadakpan sa mi-aging katu-igan. Sama ni Salibay kinsa maoy main target sa ilang operasyon human nasikop sa Provincial Drug Enforcement Unit niadtong tuig 2014 tungod sa susamang kalapasan ug ning mi-aging tuig lang nakagawas human naserbisyuhan ang iyang sentensya.
Samtang si Bilagantol, nadakpan na usab niadtong 2018 ug nabuhian pagka-tuig 2020 tungod sa plea bargaining agreement. Samtang si Degamon, naarsto na usab niadtong 2016 sa susamang kalapasan ug gibuhian sa sayong bahin ning tuiga.
