BUTUAN CITY – Namahayag na si United State Vice-President Kamala Harris human ang kada-ugan ni Republican Donald Trump ug gipadayag nga iya na kining gitimbaya sa pagdaug sa 2024 presidential election.
Sa iyang pagpamulong atubangan sa publiko sa Howard University, iyang gipasalamatan ang iyang mga supporters dayong panawagan nga dawaton ang desisyon sa kinabag-ang katawhan.
Iya usab nga gipasalig ang malinawong transisyon sa gahom ug pag-ila kang Trump nga presidente sa tanang mga Amerikano..
Samtang sa iyang pag-atubang sa iyang mga supporters didto sa Florida, gipadayag ni Trump nga mihatag na ang Amerika sa iyang wala gila-uman ug gamhanang mandato nga dili matud pa niya sayangon. Napuno sa pagpasalamat si Trump dihang misaka sa entablado ka-uban ang daghang mga tawo apil na ang iyang running mate nga si JD Vance, iyang asawang si Melania Trump ug iyang campaign staff.
Gipasalamatan ni Trump ang iyang mga supporters sa pagpili kaniya isip ika-47 nga presidente dayong saad pagtambal sa ilang nasud ug sulbaron ang problema sa ilang mga borders.
