BUTUAN CITY – Disgrasya ang gikamatyan sa usa ka motorista nga napalgan na lang nga wala na’y kinabuhi samtang anaa sa ubos nga bahin sa imburnal sa Purok Suatan, Brgy. Ambago ning siyudad sa Butuan kaganinang alas-5:30 sa sayong buntag.
Naila ang biktimang si Ivan Gerona, 25-anyos, duna’y kapuyo ug residente sa Purok 8, Slaughter, Brgy. Obrero ning siyudad. Sa pakighinabi ning sibyaha, gibutyag ni PLt. Judan Alvizo sa Butuan City Police Station 3 nga naka-inom matud pa ang biktima kinsa gipug-ngan pa sa iyang mga ginikanan nga dili na mubiyahe apan nagmagahi kini ug mu-apas unta sa iyang mga barkada nga atua sa Brgy. Masao.
Posibleng wala na mabalanse sa biktima ang iyang gimanihuang motorsiklo dihang misarasay kini hangtud nga nabangga ug midiretso siya kalagpot sa ubos nga bahin. Nabu-ak ang gisuot niining helmet ug nakitang duna’y samad sa iyang ulo nga posibleng nabagok sa semento hinungdan sa iyang hinanaling kamatayon.
