BUTUAN CITY – Gimanduan ni Pangulong Ferdinand Marcos Jr., ang tanang mga ahensya sa gobyerno apil na ang mga Government Owned and Controlled Corporations (GOCCs) ug mga pangpublikong tunghaan nga i-apil sa flag ceremony ang Bagong Pilipinas Hymn and Pledge.
Base sa gipagawas nga Memoramdum Order nga pirmado ni Executive Secretary Lucas Bersamin, tumong niini nga isilsil sa alimpatakan sa mga Pilipino ang prinsipyo sa bag-ong gobyerno nga nakasentro sa panaghi-usa sa matag-institusyon sa katilingban.
Gimanduan usab ang kadumalahan sa mga ahensya sa kagamhanan partikular ang Presidential Communications Office nga manguna sa maayo nga pagpatuman sa mga latakaran kalabot sa Bagong Pilipinas Hymn.
Base sa R.A. No. 8491 o ang “Flag and Heraldic Code of the Philippines,” ang tanang opisina sa goberno lakip ang mga local government units kon LGUs adunay mandato nga magpahigayon og flag raising ceremony matag Lunes sa buntag og flag lowering ceremony matag Biyernes sa hapon.
