BUTUAN CITY – Apektado ang duha ka mga mata sa usa ka 8-anyos nga batang lalaki sa Brgy. Mahay ning siyudad sa Butuan human milagsik sa iyang nawong ang mga mibuto nga tinapok niyang pulbura gikan sa gipamunit niya nga pabutong fountain kaganinang alas-4:20 sa kaadlawon.
Sigon sa ama-ama sa biktima, daan na niyang gibadlong ang bata nga dili mamunit sa mga pabuto kondiin apil sa napunitan niini ang usa ka fountain nga wala nakabuto nga gibutangan matud pa niini og dinagkutan nga sigarilyo.
Nakurat na lang sila dihang nagdali-dali pagpangayo og tubig ang bata ngadto kaniya nga iyang gihilam-os dayong sulti nga nabuthan kini nga miresulta sa na-angkong paso sa iyang nawong ug dili pa mabuka niyang mata hinungdan nga ila gilayon kining gidala sa Butuan Medical Center kon BMC.
Sa pagkakaron dili pa nila masuta kung unsa ang extent sa injury sa mata sa biktima tungod kay naghulat pa sila sa espeyalistang mususi niini.
Hinuon makasulti ug makakaon gihapon ang biktima bisan pa man sa na-angkong injuries samtang naghulat pa sa mahimong findings sa doktor.
Mi-apela kini sa katawhan nga muhatag kanila og ayuda aron magamit sa pagpatambal sa biktima kinsa duha ka higayon nang natupukan og ante-tetanus.
