BUTUAN CITY – Muabot sa 101 ka mga estudyante sa Lingig, Surigao Del Sur ang daling gidala sa balay-tambalan tungod sa gitoohang food poisoning.
Sigon sa Police Regional office-13, natigayon ang insidente alas-12:00 sa udto sa nakalabay nga adlaw sa upat ka tunghaan, ang San Roque Elementary School, Tigbawan Elementary School, Pagtilaan Integrated School og Mandus Elementary School sa Lingig, Surigao del Sur.
Nakadawat na lang og impormasyon ang Lingig Municipal Police Station mahitungod sa gitoohang food poisoning diin anaa sa 101 ka estudyante ang biktima.
Sa inisyal nga imbestigasyon nasuta ang nasangpit nga mga tunghaan mihimo kini sa ilang School-Based Feeding Program (SBFP) sa Department of Education (DepEd), diin ang pagkaon nga gihatag sa mga bata gi-cater ni Maria Gracia Lucar Noquiao.
Sigon ni Josie Christie Badang, AO II sa Pagtilaan Integrated School, pila ka oras lang sukad nga nakakaon sa maong pagkaon, anaa sa 101 ka estudyante ang nakasinati sa pagsakit sa tiyan og daling gidala sa Lingig Community Hospital alang sa medical nga atensiyon.
Gihimo na ang dugang imbestigasyon og koordinasyon sa hingtungdang mga tungdaan og medical personnel aron madetermina ang sirkumstansiya sa panghitabo.
Sa pagkutlo ning balita, tulo ka estudyante ang nagpabiling na-admit sa maong hospital og gikatahong anaa na sa stable nga condition samtang ang nahabiling mga biktima na-discharge na human ang tukmang medical attention og naka-rekober na sa ilang mga simtomas nga nabatian.
