BUTUAN CITY – Pormal nang gi-ablihan kaganinang buntag sa lokal nga kagamhanan sa dakbayan sa Butuan ang Business One Stop Shop kon BOSS didto sa Robinsons Place Butuan sa pagpanguna sa City Business Permits and Licensing Office.
Nanguna sa pag abli niini sila Vice Mayor Lawrence Lemuel Fortun, Konsehal Joseph Omar Andaya, Konsehal Arturo Gado, City Interior and Local Government Director Charissa Guerta ug City Business Permits and License Office Head Atty. Moshi Ariel Cahoy.
Sa unang adlaw pa lang sa paglusad sa BOSS, daghan na nga mga negosyante ang mi-avail niini tungod sa ilang pag-renew ug pag-apply og Business Permit alang ning tuig 2023.
Init usab silang gi-welcome ni Konsehal Omar Andaya kinsa usa usab ka negosyante dungan sa panghinaut nga unta i-avail na kini sa tanang mga negosyante aron hapsay ang dagan sa ilang pagnegosyo ug matabangan ang lokal nga kagamhanan nga mapatas-an ang kita niini diha sa pamuhis.
