BUTUAN CITY – Ipasaka na ugmang adlawa sa Cabadbaran City Police Station pinaagi sa inquest proceedings ang kasong reckless impudence resulting to multiple homicide and damage to property batuk sa driver sa kolor puti nga Isuzu Strada pick-up human mibangga sa kasugat niining traysikol resulta sa pagkamatay sa tulo ka managsilingang sakay niini.
Naila ang mga namatay nga sila Aldrin Guergio, minyo; Miraflor Gavilan ug Reynaldo Fajardo, 56-anyos parehong residente sa Purok 4, Brgy. Sumilijon ning siyudad samtang ang driver sa pick-up nailang si Geoffrey Lawrence Torralba, 27-anyos, residente sa Purok 15-A, Brgy. San Vicente ning siyudad sa Butuan
Sa eksklusibong pakighinabi sa Bombo Radyo Butuan, gipadayag ni Cabadbaran City Police Station commander Renel Serrano nga base sa asuy kaniya sa driver sa pick-up nga si Torralba, padulong unta sila sa Cabadabran City aron iplastar ang nagpa-cater kanila apan pag-abot sa dapit nga nahitabuan, na-slide ang ligid sa likod nga bahin sa iyang sakyanan rason sa pag-swerve niini padulong ngadto sa kasugat nilang traysikol.
Tungod sa kakusog sa impact, daw lata kining nagupi ug nangalagpot ang tulo ka mga sakay niini nga sa ilang unang pagsusi, wala na’y nabati nilang pulso.
Bisan pa man, gidala gihapon nila kini sa Cabadbaran Emergency Hospital diin gideklara nang dead-on-arrival ang mga biktima.
Sa dapit nga nahitabuan, ilang narekober ang duha ka mga bag kondiin ang usa duna’y sulod nga 41-mil pesos samtang 1,120-pesos usab ang sulod sa laing usa ug duna pa’y bulawang singsing.
Migawas sa ilang pakisusi nga pa-uli na unta ang mga biktimang sakay sa traysikol human namaligya og baboy sa maong siyudad apan wala na maka-abot pang buhi sa ilang pinuy-anan tungod sa maong hitabo.
